Visa Karibense i Visa Schengen

Residentenan di Kòrsou ku no tin nashonalidat hulandes, den algun kaso mester apliká pa un visa karibense. Por ehèmpel pa biaha pa otro parti karibense di reino hulandes (Boneiru, Aruba, Saba, Sint Eustatius i Sint Maarten).

Visa di 90 dia òf ménos

Na momentu ku ta biaha pa otro parti karibense di reino pa 90 dia òf ménos, den prinsipio un visa karibense pa estadia korto ta nesesario. Esnan ku tin e visa akí, por keda riba e islanan menshoná pa un máksimo di 90 dia (denter di un periodo di 180 dia). Tin algun eksepshon riba e obligashon di visa, ku ta deskribí aki.

Pa ken e no ta nesesario?

Personanan ku un di e nashonalidatnan riba e lista akí di nashonalidat eksonerá di visa no mester di un visa karibense. Pasahero den tránsito òf ku ta biaha ku barku krusero, tampoko mester apliká pa un visa karibense. Na momentu ku nan biaha pa e partinan karibense di reino, nan mester kumpli sí ku e rekisito di entrada pa biahenan eksonerá di visa.

Estadia di mas di 90 dia

Un persona ku ke keda na parti karibense di reino pa mas di 90 dia, mester di un pèrmit di estadia. E persona aki mes no por apliká pa su pèrmit di estadia. E mester di un referensia pa hasi esei, manera por ehèmpel un pareha òf dunadó di trabou. Por tuma kontakto ku outoridat lokal di Aruba, Boneiru, Kòrsou, Saba, Sint Eustatius òf Sint Maarten pa mas informashon tokante e prosedura di solisitut.

Den algun kaso, personanan ku no tin nashonalidat hulandes mester apliká pa un visa pa por drenta paisnan Schengen, inkluyendo Hulanda. Esaki yama un visa Schengen. Hulanda no nesesariamente mester ta e destino prinsipal di e biahero. Por apliká pa un visa Schengen na Gabinete di Gobernador di Kòrsou pa biahe pa e siguiente paisnan: Bèlgika, Estonia, Fransia, Hungria, Islandia, Italia, Lituania, Luxemburg, Noruega, Austria, Portugal, Spaña i Suesia.

Gabinete di Gobernador di Kòrsou solamente ta trata solisitutnan pa e área Schengen di personanan ku tin un pèrmit di estadia ku un balides di por lo ménos tres luna despues di nan regreso pa Kòrsou òf Boneiru.

Visa di 90 dia òf ménos

Personanan ku un visa Schengen pa estadia korto por biaha libremente na Hulanda i otro paisnan Schengen te un máksimo di 90 dia (denter di un periodo di 180 dia).

Pa ken no ta nesesario?

E paisnan Schengen a traha akuerdo ku sierto pais. Posiblemente bo no mester di visa. Por komprobá esei riba e página akí.

Estadia di mas di 90 dia

Personan ku ke keda Hulanda pa mas di 90 dia, posiblemente mester di un visa pa estadia largu. Por ehèmpel si nan mester keda pa trabou, estudio òf pa bai biba serka famia na Hulanda. Tin biaha nan mester di un pèrmit di estadia tambe. Un visa pa estadia largu yama tambe un outorisashon pa estadia provishonal (machtiging tot voorlopig verblijf – mvv). Ta dependé di nashonalidat i e ophetivo di e estadia si un hende mester di un mvv i/òf pèrmit di estadia. Por haña mas informashon tokante di e mvv na e departamento di asuntunan konsular. Servisio di Inmigrashon i Naturalisashon (Immigratie- & Naturalisatiedienst - IND) por duna informashon tokante e pèrmit di estadia na Hulanda.

Ta dependé di e kaso i e situashon si un persona tin obligashon di visa. Meskos ta konta pa e dokumentonan rekerí pa trata e solisitut di visa. P'esei, ta rekomendabel pa tuma kontakto adelantá ku e departamentu di asuntunan konsular. Si resultá ku bèrdat e persona mester di un visa, e mester traha un sita pa entregá e solisitut.

Nota bon: Durante e periodonan di fakansi i dianan di fiesta, e prosedura di solisitut i tratamentu por tuma mas tempu.

Pa 2024*, e gastu pa ámbos visa ta NAfl. 160,-. Kliente por paga ku tarheta na florin antiano (ANG) na Gabinete di Gobernador di Kòrsou.

* Anualmente, ta indeksá e gastunan pa e visanan.