Pa biahenan pa eksterior, mester tin un dokumento di biahe bálido. Un persona ku no tin un dokumento di biahe bálido òf ku a pèrdè esaki, den kasonan hopi eksepshonal i bou di kondishonnan estrikto por apliká pa un pasport di emergensia na departmentu konsular di gabinete di gobernador. E pasport di emergensia ta un dokumento di biahe temporal i e no ta bálido komo dokumento di identidat.
Ta entregá pasport di emergensia solamente na persona ku por prueba ku nan tin nashonalidat hulandes. Na momentu di entregá e solisitut, e persona mester entregá prueba ku ta demostrá e echo ku e tin nashonalidat hulandes.
Ademas, mester tin un motibu urgente pa e solisitut di un pasport di emergensia, manera un emergensia médiko òf fayesimentu di un pariente den promé òf di dos grado.
Personanan ku no tin nashonalidat hulandes i ku a pèrdè nan dokumento di biahe, mester tuma kontakto ku e konsulado di nan pais di orígen.
Na momentu di entregá e solisitut, por rekerí e siguiente dokumentonan:
Un dokumento di identidat bálido (manera un reibeweis òf sédula);
Un akta di nasementu original resien (no mas bieu ku 6 luna) pa menor di edat òf adulto ku nunka a yega di tin pasport;
Un dokumento di identidat bálido di e mayor(nan) pa mucha menor di edat;
Dokumento di tutela original – si ta aplikabel – pa mucha menor di edat;
Pèrmit ofisial di ámbos mayor – si ta aplikabel – ku un kopia di e pasport di e mayor ku ta den eksterior, si esei ta e kaso;
Prueba di un sita pa solisitut di un pasport nashonal nobo na departamento di Asuntunan Públiko (Kranshi) si e persona en kuestion ta biba na Kòrsou;
Prueba di e echo ku no por posponé e biahe.
Na momentu ku un persona a pèrdè su pasport hulandes, e mester presta deklarashon na gabinete di gobernador promé ku e por optené un pasport di emergensia. Ta hasi esaki yenando e formulario "Deklarashon pèrdida dokumento di biahe". E ora ei, gabinete ta tuma kontakto ku e instansia ku a emití e pasport pèrdí.
A base di e informashon optené, ta identifiká e solisitante di e pasport di emergensia. No por emití un pasport di emergensia te despues ku a identifiká e solisitante.
Si a hòrta e pasport hulandes, mester mustra un prueba original di denunsia na momentu ku ta apliká pa e pasport di emergensia.
Den kaso ku e persona konserní mester biaha pa motibunan médiko, e por haña un pasport di emergensia ku un balides máksimo di 1 aña. Si e biahe ta pa motibunan no-médiko, e persona ta haña un pasport di emergensia pa durashon di e biahe.
Si e persona ku ta biaha pa motibunan no-médiko, no ta biaha pa Kòrsou bèk, e pasport di emergensia ta bálido pa e durashon di e biahe di ida. Si e persona ta bini Kòrsou bèk, e ora ei e dokumento ta bálido te e fecha di regreso, manera e ta skibí den e pasashi di ida i buèlta. Na momentu di su regreso, e persona konserní mester entregá e pasport di emergensia na gabinete di gobernador.
Solisitá i pasa tuma personalmente
Den prinsipio, e persona ku mester di e pasport di emergensia mester ta presente personalmente tantu na momentu di e solisitut komo na momentu ku ta pasa tuma e dokumento di biahe. Esaki tin keber ku identifikashon. Den kaso di urgensia médiko por hasi un eksepshon riba e regla aki.
Visa
Algun pais ta pone rekisito adishonal òf diferente pa dokumento di biahe. Por ehèmpel, nan por rekerí ku e persona konserní tin un visa. Embahada òf konsulado di e pais en kuestion por konfirmá si e pasport di emergensia ta bálido pa biaha pa e pais ei.
Biaha pa Merka
Den prinsipio, no ta posibel pa biaha pa Merka ku un pasport di emergensia. Konsulado General di Merka na Kòrsou por duna mas informashon tokante e tema akí, via number di telefòn +5999 461 3066.
Responsabilidat
Gabinete di Gobernador di Kòrsou no ta responsabel si un biahe no por kontinuá debí na e echo ku no a risibí e pasport di emergensia na tempu.
Biahe médiko
Den kaso di un biahe pa motibunan médiko, Banko di Seguro Sosial (SVB) ta informá gabinete tokante di e nesesidat di e biahe. SVB ta informá e kliente kua dokumento e tin mester. Seguidamente, SVB ta traha un sita pa e kliente na gabinete pa entregá i firma tur e dokumentonan nesesario. Asina e fail ta kompleto, por bin tuma e pasport di emergensia.
Biahe no-médiko
Den kaso di un biahe no-médiko, e persona mes mester tuma kontakto ku gabinete di gobernador. E trahadónan ta duna informashon tokante e dokumentonan nesesario pa e situashon spesífiko. Despues por traha un sita na gabinete pa entregá i firma tur formulario. Asina e fail ta kompleto, ta tuma un desishon tokante entrega di e pasport di emergensia. Despues por bin tuma e dokumento di biahe.
Pa 2024*, e tarifa pa un pasport di emergensia ta NAfl. 112,-. Kliente por paga ku tarheta na florin antiano (ANG) na Gabinete di Gobernador di Kòrsou.
* Anualmente, ta indeksá e gastunan pa e pasport di emergensia.
Tin biaha tin situashon di emergensia médiko urgente. Den e kaso ei, e trahadó konsular na warda por traha un pasport di emergensia despues di orario di ofisina tambe. Den e kasonan ei ta rekerí sí ku SVB ta konfirmá por eskrito ku e persona konserní mester biaha pa motibu médiko urgente. Pa e kasonan akí tin un trahadó konsular na warda ku ta alkansabel via number di telefòn +5999 513 1986.
