Un pasport nashonal ta e pasport di reino hulandes. E pasport akí ta un dokumento di biahe pa personanan ku nashonalidat hulandes. Esnan ku tin e pasport akí por biaha rònt mundu kuné.
Residente di Kòrsou
Residente di Kòrsou ku nashonalidat hulandes, na Kòrsou por pidi un pasport nashonal na departamentu di Asuntunan Públiko (mihó konosí komo Kranshi). Residente di Kòrsou ku nashonalidat hulandes ku pa motibu di nan trabou mester di un di dos pasport, ta apliká pa e di dos pasport akí na gabinete di gobernador.
No-residente di Kòrsou
Den algun kaso, personanan ku nashonalidat hulandes ku no ta residente di Kòrsou ta apliká pa un pasport nobo na gabinete di gobernador, por ehèmpel si e periodo di balides a vense òf lo vense, òf si a daña, hòrta òf pèrdè e pasport. Esaki ta konta entre otro pa:
Stazjèr hulandes;
Marinero hulandes;
Hulandes ku ta biahando rònt mundu;
Hulandes na Kòrsou ku no por inskribí ainda den e registro di poblashon di Kòrsou debí ku nan ta pendiente di nan pèrmit di estadia.
Residente di munisipio hulandes
Hulandesnan ku ta registrá na un munisipio hulandes mester apliká pa un pasport na nan mes munisipio.
Hulandes ku ta biba pafó di reino hulandes
Hulandesnan ku ta biba pafó di reino hulandes por apliká pa nan pasport na e representashon diplomátiko òf konsular di Hulanda na e pais ku nan ta biba. Na momentu ku nan ta na Hulanda temporalmente, nan por traha un sita tambe na un di e munisipionan ku ta entregá pasport na hulandesnan ku ta biba afó. Por haña mas informashon tokante di esaki riba e página akí di gobièrnu di reino.
No-residente ku ke apliká pa, òf pasa buska un pasport nashonal na gabinete di gobernador, mester traha un sita pa esaki. Por hasi esei a traves di e departamentu di asuntunan konsular. Na e momentu ku ta apliká pa e pasport mester entregá e siguiente dokumentonan:
e pasport nashonal aktual original di e solisitante;
si ta aplikabel: e di dos pasport hulandes di e solisitante;
den kaso di vários nashonalidat: tur pasport di e nashonalidatnan ei;
prueba resien di no-residensia na Kòrsou di Kranshi;
formulario di solisitut di pasport kompletamente yená + formulario C-2 kompletamente yená (solamente den kaso di pasport pèrdí).
Semper mester apliká pa pasport personalmente. Mucha tambe mester ta presente personalmente na momentu ku ta apliká pa un pasport pa nan.
Den práktika, e prosedura di solisitut di e pasport nashonal ta dura dos pa seis siman. Ta informá e solisitante na momentu ku por bin tuma e pasport na gabinete di gobernador. Mester pasa tuma e pasport denter di tres luna despues ku a apliká p’e, sino, ta destruí e pasport. Den e kaso ei, e solisitante mester bolbe solisitá e pasport i bolbe paga e gastunan.
Gabinete di gobernador no ta responsabel si un biahe no por bai dor debí na e echo ku no a risibí e pasport nobo na tempu. P'esei, ta konsehá pa no kumpra pasashi te despues ku a tuma e pasport nobo.
Na 2024*, e gastunan pa un pasport nashonal ta:
Produkto
Gastu
Pasport nashonal pa personanan te 18 aña
(periodo di balides 5 aña)
NAfl. 149,-
Pasport nashonal pa personanan for di 18 aña
(periodo di balides 10 aña)
NAfl. 189,-
Pasport di negoshi** pa personanan te 18 aña
(periodo di balides 5 aña)
NAfl. 149,-
Pasport di negoshi** pa personanan for di 18 aña
(periodo di balides 10 aña)
NAfl. 189,-
Di dos pasport
NAfl. 149,-
* Anualmente, ta indeksá e gastunan pa e pasport hulandes.
** Un pasport di negoshi ta un pasport hulandes ku 64 página en bes di 32.Asina tin mas espasio pa visa i stèmpel di duana. Generalmente, personanan ku ta biaha hopi ta pidi e pasport akí.
Kliente por paga ku tarheta na florin antiano (ANG) na Gabinete di Gobernador di Kòrsou.
