Kompetensianan

Rei i ministernan ta forma Gobièrnu di Kòrsou. Gobernador di Kòrsou ta representá rei na Kòrsou. Den e kapasidat ei, e ta hefe di Gobièrnu di Kòrsou. Na momentu ku gobernador ta asistí na un reunion di Konseho di Minister di Kòrsou, e ta aktua komo presidente. E ora ei, e tin un voto asesor.

Komo hefe di gobièrnu, gobernador tin e derecho di ser konsultá pa e ministernan, di enkurashá e ministernan, i di atvertí nan (the right to be consulted, to encourage and to warn).

Responsabilidat

Gobernador ta inmune, e ministernan ta responsabel. E ministernan ta responsabilisá na Parlamento di Kòrsou tokante e aktuashon di gobernador komo órgano di pais.

Tarea i kompetensianan

Komo hefe di gobièrnu di pais, gobernador ta ehersé entre otro e siguiente tarea- i kompetensianan:

• Firma ordenansa- i dekretonan nashonal;
• Huramentá minister, miembro di Parlamento di Kòrsou, miembro di Konseho di Konsulta (Raad van Advies) i miembro di Kontrolaria General (Algemene Rekenkamer). Ademas, gobernador ta huramentá sierto funshonario den gobernashon públiko, ku sigun lei mester huramentá òf primintí dilanti gobernador;
• Huramentá wes, prokurador-general di Ministerio Públiko, komisarionan, presidente i direktornan di Banko Sentral di Kòrsou;
• Habri e aña parlamentario riba e di dos djamars di sèptèmber. Na e momentu akí, ta presentá e maneho ku gobièrnu lo hiba;
• Nombra informador i formadornan den kuadro di formashon di un gobièrnu nobo;
• Den su papel di presidente di Konseho di Konsulta (Raad van Advies), gobernador por yama reunion ora e konsiderá esei nesesario. Si e mes ta presente, gobernador ta dirihí e reunion i ta duna konseho (voto konsultativo).

Komo representante di gobièrnu di reino, gobernador ta vigilá interes general di Reino Hulandes. Den e kapasidat akí, gobernador ta responsabilisá na gobièrnu di reino.

Proklamashon di lei i implementashon di regulashon

Gobernador ta enkargá ku proklamashon na Kòrsou di leinan di reino i medidanan general di gobernashon di reino. Ademas, gobernador ta promové implementashon di regulashon di reino i tratadonan ku ta aplikabel na Kòrsou.

Supervishon

Gobernador ta supervisá kumplimentu ku lei i tratadonan di reino na Kòrsou. Ademas, gobernador lo no formalisá un ordanansa òf dekreto nashonal si e ta konsiderá ku esaki ta kontra un lei di reino, un medida general di gobernashon di reino òf un tratado. Gobernador tampoko lo formalisá un ordenansa òf dekreto ku ta kontra seguridat hurídiko òf rekisitonan di bon gobernashon.

Forsa armá

Ku konsentimentu di Konseho di Minister di Reino, gobernador ta outorisá pa pone partinan di ehérsito na disposishon di gobièrnu di Kòrsou pa mantenshon di seguridat i órden públiko (asistensia militar) òf den kaso di kalamidat òf aksidente.

Demas kompetensianan

Ademas, gobernador komo órgano di reino ta responsabel pa:

• Entrega di pasport hulandes, pasport di emergensia i laissez-passer;
• Entrega di visa pa teritorio Schengen (parti di Union Oropeo);
• Aseptashon di petishon pa nashonalidat hulandes (naturalisashon);
• Otorgamentu di nashonalidat hulandes (prosedura di opshon);
• Asesoramentu tokante, i otorgamentu di kondekorashon real;
• Ekstraditá òf laga di ekstraditá personanan pa otro Estado.