Kas di Gobernador

E Kas di Gobernador tin tres piso: e piso abou, un promé piso konektá ku e kurá i un zòlder.

Piso abou

Riba e piso abou tin entre otro e kasita di pòrtir ku vigilansia di polis, e kantor di e atzjudant di gobernador, garashi pa e outonan di servisio di gobernador, i un sala di akohida pa bishitante ku ta drenta Kas di Gobernador ku left.

Promé piso

Por drenta e promé piso di Kas di Gobernador via trapi òf ku left. Riba e piso akí tin sala di akohida, ofisina di gobernador, sala di resepshon kaminda ta tene entre otro seremonia di huramentashon i di naturalisashon, kamber di balkon ku bista riba haf, un pasio ku pòrtrèt di e èks gobernadornan kologá na ámbos banda, kushina, un komedor grandi i un komedor chikí, tres kamber di salon konektá i un kamber di drumi prinsipal ku su baño. 

Kurá 

For di e kamber di balkon tin un pasashi pa drenta e kurá di Kas di Gobernador. Por yega e kurá for di e piso abou tambe, pa medio di un pat ku ta bai ariba. For di e kurá - ku ta piedrá ku klenku - tin bista riba parti di sentro di siudat, riba Emmabrug i riba haf. Ta utilisá e kurá akí pa e resepshon ku gobernador ta organisá pa Aña Nobo i Dia di Rei. Ademas, den e kurá, gobernador ta risibí e saludo na momentu ku un barku di stashon di marina ta drenta haf pa promé biaha.

Zòlder 

E piso di zòlder ta konsistí di un asina yamá zòlder grandi i un zòlder chikí. Akinan tin e kambernan privá di gobernador i su famia.

Fort Amsterdam tin un istoria riku ku ta bai bèk te 1634, na momentu ku e hulandesnan liderá pa Johan van Walbeeck a konkistá Kòrsou for di e spañónan. Konstrukshon di Fort Amsterdam a marka kuminsamentu di desaroyo di Willemstad komo sentro di siudat. E Kas di Gobernador aktual ta na e mesun lugá kaminda na 1635 a konstruí e promé fòrti. Den e dos añanan ku a sigui, na e sitio akí a konstruí e promé kas di e representante ku tabata tambe direktor di West-Indische Compagnie (WIC). E tabata un kas di dos piso, konstruí ku materialnan ku pa gran parti a trese for di Amsterdam.

Situá riba un punto stratégiko na entrada di Bahia di Santa Ana, Fort Amsterdam ta esun di mas grandi di e ocho fòrtinan na Kòrsou. Danki na su nifikashon istóriko i kultural e ta riba e Lista di Patrimonio Mundial di UNESCO.

E edifisio original di palu, ku tabata fungi komo kas di e representante di West-Indische Compagnie (WIC), a keda remplasá despues pa un struktura di piedra. Den transkurso di añanan a renobá i amplia Kas di Gobernador vários biaha. Ku e renobashon i ampliashonnan akí, e estilo a kambia, pero a konservá e nifikashon istóriko.

Entre 1868 i 1870 a traha plan pa, ku algun modifikashon, renobá e edifisio i krea mas espasio. Por ehèmpel a pensa di amplia e galeria i agregá ornamentu. Sin embargo, e uso di koral machiká komo base pa semènt a kousa un vulnerabilidat kontinuo. E salu den e koral ta atraé asina tantu humedat ku na sierto lugá no ta sufisiente pa pone un man di fèrf nobo tur aña pa tene e murayanan limpi i nèchi. Bou di direkshon di Gobernador Römer (1983-1990), a renobá Kas di Gobernador ekstensivamente, ku reparashon i mehorashon struktural pa garantisá durabilidat.

Banda di su tareanan atministrativo ku e ta ehekutá pa gobernador, gabinete di gobernador ta empeñá tambe konservashon, maneho i protekshon di e monumentu istóriko akí.